Shawn Achor, 'n dosent aan die Harvard Universiteit en wenner van 'n reeks toekennings oor sy bevindings in die veld van sielkunde, het die boek "The happiness advantage" geskryf. In verskeie onderhoude wat met hom gevoer is beskryf hy waarom "positiewe denke" nie net eenvoudig 'n ongegronde, impulsiewe aanmaning van jou ouers is wat net moeg is vir jou negatiwiteit nie. Maar, dat werknemers se geluksvlak 'n wesenlike effek het op maatskappye se sukses, winste, verhoudings en kultuur. Hier is 'n opsomming vanuit onderskeie onderhoude met Achor:
Plesier vs Geluk
Plesier word beskryf as iets wat onmiddelike verligting, vervulling en plesier gee. Soos om 'n roomys of 'n sjokolade te eet. Geluk is egter iets anders, geluk is blywend en nie net 'n oombliklike ervaring nie. Jy kan geluk ervaar terwyl jy iets doen wat nie noodwnedig veel plesier verskaf nie, byvoorbeeld om te draf en steeds gelukkig is omrede jy nader aan jou doelstelling beweeg. Geluk is volhoubaar en vind plaas oor 'n geruime tyd.
Les: Verruil korttermyn plesier vir blywende geluk.
90% van jou geluk is onvoorspelbaar
Volgens Shawn Achor kan sielkundiges net 10% van ons geluk voorspel deur na eksterne faktore soos rykdom, aantreklikheid, invloedryke ouers, 'n mooi motor of enige iets anders wat tradisioneel gesien word as die omvang van ons geluk, te kyk. Die oorblywende 90% is onbekend, dit word opgemaak deur hoe jy dink oor jou omstandighede. Daar is gevind dat boere in Zimbabwe, wat soms in wreedaardige en vreesaanjaaende omstandighede leef, se geluksvlak hoër is as proffesionele bankiere in Switzerland. Bankiere verval in 'n depressie as hulle nie bonusse kry nie maar vir een of ander rede is baie Zimbabwiese boere steeds gelukkig. Wat was die verskil? Dít:
- Hoe jy oor jou eie omstandighede dink
- Hoe jy oor jou familie dink
- Optimisme (dinge sal beter gaan as ek aanhou probeer)
- Sosiale konneksies (boere wat n vrees leef het dikwels sterker sosiale kringe omdat hulle afhanklik is van mekaar)
- Die vyf mense met wie jy die meeste van jou tyd spandeer bepaal jou gemoedstoestand
Sosiale konneksies is so belangrik dat dit selfs 'n beter voorspeller is van hoe lank jy gaan lewe as faktore soos rook of vetsug. Inteendeel, navorsing wys dat sterk sosiale konneksies (ondersteuningsnetwerk) vetsug laat afneem en mense laat ophou rook.
Les: Bou volhoubare, positiewe sosiale kringe
Geluk eerste, dan geld
Die grootste kompeterende voordeel in besigheid is 'n positiewe en betrokke brein. Wanneer jou brein blywende geluk ervaar en ingestel is op die betekenis wat jy toevoeg, gebeur die volgende:
- Produktiewe energie styg met 31%
- Sowat 37% meer suksesvol met verkope
- Jou kans vir 'n verhoging styg met 40%
- Jou vlak van kreatiwiteit vertrippel
Les: Help jou werknemers om bewus te wees van die groter betekenis in hulle werk, want geluk kweek produktiwiteit.
Is geluk gekweek of oorerflik?
Les: Geluk word gekweek, nie geërf nie.
Ontwerp jou dag
Nog 'n voorbeeld is waar mense blootgestel is aan positiewe idees en toe gevra is om 'n koerant deur te blaai en die aantal prente te tel, en as hulle reg is kry hulle $5. Op bladsy 2 van die koerant is 'n groot advertensie wat sê as jy nou die eksperiment stop, kry jy $10. Sowat 80% van mense het $10 verdien. Met mense wat blootgestel is aan negatiewe idees voor die eksperiment, het net sowat 20% die advertensie op bladsy 2 raakgesien. Dit beteken dat 'n positiewe ingesteldheid meer geneig is om ons geleenthede te laat raaksien.
Les: Geluk is de grootste voorspeller van sukses
